Hip-h’òc, une rencontre, qu’ei ua creacion susprenenta e poetica qui mescla hip-hop e dança tradicionau. Que son dus estiles que lo monde n’imaginan pas véder ensemble sus ua scèna d’espectacle : un qu’ei urban, l’aute rurau ; un qu’ei recent, l’aute qu’a ua istòria longa ; un que’s practica meilèu sol, l’aute meilèu en parelh o en grop… Mes qu’an tanben punts comuns, com la lor origina populara o lo hèit d’estar restacats a ua cultura rica.

Lo resultat ne podé pas estar qu’explosiu. Lo rencontre enter un dançaire de hip-hop, duas dançairas tradicionaus e duas musicianas-dançairas tradicionaus que sorteish deus còdis de las duas esteticas. Hip-h’òc, une rencontre que crotza las generacions, los genres, las practicas.

Los artistas que s’i son escaduts a trobar ligams enter las lors esteticas. Per’mor quiòc, qu’existeishen « battles » dens las danças tradicionaus, e que’s pòt har pas de hip-hop au bèth mièi d’un rondèu. A partir d’aquò, qu’an bastit ponts, teishut tramas, tà perpausar un espectacle au còp inedit e poetic.

• Dança hip-hop : Mickaël Minjou
• Dança tradicionau : Brigitte Bouncer, Sylvie Marty
• Musica e dança tradicionaus : Mathilde Duffau, Anne-Lise Herbel
• Direccion artistica : Laurence Bernatas, Marie-Claude Hourdebaigt

Hip-h’òc, une rencontre qu’ei ua creacion de l’associacion Menestrèrs Gascons e de l’escòla de dança Le Labo, dab lo sostien deu Departament deus Pirenèus-Atlantics.