Despuish lo mes d’abriu, Menestrèrs Gascons que prepausa cada dimèrcs ua petita emission hèra corta arron la dança, la musica o lo cant tradicionaus gascons.
Las claus tà dançar que prepausa petitas astúcias sus punts precís de las danças tradicionaus : lo rebomb de l’escotisha, lo batut deus Sauts…
Ac sabètz ? qu’ei ua emission dens la quau un expèrt e respon en mensh d’ua minuta a ua question sus la cultura gascona : de qu’ei la polifonia bearnesa, perqué e’s ditz branlo « d’Aussau »…
Lo cançonèr illustrat que hica en imatges, de faiçon sovent umoristica, las paraulas d’un cant tradicionau gascon.
Lo blind-test que vs’invita a devinar, cada trimèstre, lo títol de cinc extrèits de musicas d’un CD de Menestrèrs Gascons.
Enfin, dens Los talhèrs que’vs hèn tocar, un aprenent deus nostes talhèrs que presenta un tròç de musica qui l’agrada.