Bona annada, plan granada !

Que’vs desiram a tots ua hèra bona annada 2021, en esperant que’ns portarà lo tornar deus bals e deus concèrts.

En l’espèra, que’vs perpausam de tornar en video suus moments hòrts de 2020 tà Menestrèrs Gascons :

Ua annada 2020 marcada per la crisi sanitària…

L’annada 2020 qu’estó dificila tà tots los actors de la cultura, dont los de la dança tradicionau qui an particularament patit l’obligacion de distanciacion sociau. La nosta associacion n’ei pas ua excepcion e que’ns calè aver creativitat tà ns’adaptar a la situacion sanitària

Totun, qu’avèm perseguit tant plan com ac podèvam las nostas activitats :

• Los talhèrs, quan èra possibla, qu’estón assegurats en presenciau o en visioconferéncia
• Sautejada e Balmesclat, los dus eveniments grans organizats per l’associacion, que’s debanèn en edicion numerica

Autes projèctes qu’estón reportats a 2021 e qu’èm a perpensar a adaptà’us a las constrentas sanitàrias (formacion de formators Tots en dança, exposicion deus 40 ans de Menestrèrs Gascons, edicion de Tà dançar la Gasconha en video…).

La màger part de las prestacions que prepausàvem, malurosament, que virèn a plaser o n’an pas briga virat despuish lo mes de març (estagis, bals deus nostes grops, estúdio d’enregistrament).

… mes dab beròjas escadudas

Maugrat tot aquerò, que notam punts positius tad aquera annada 2020. Lo purmèr qu’ei l’aviada de la creacion « Hip-h’òc, une rencontre », un espectacle de dança qui mescla hip-hop e dança tradicionau. Realizat en partenariat dab l’escòla de dança Le Labo, que’n podotz véder purmèrs extrèits au parat de la Sautejada. Qu’anóncian ua creacion rica, originau e poetica.

La Sautejada era medisha, s’estossa tienuda en numerica, qu’estó un moment de partatge e de convivialitat. Las condicions sanitàrias que’ns forcèn a inventar ua fòrma d’eveniment navèra, qui mescla desfís en amont, activitats en linha, dirècte video, animacions interactivas e modèle economic adaptat. Aquera experiéncia qu’a hèra enriquesit las nostas competéncias e la nosta faiçon de concéber l’evenimenciau. Que tornaram solide utilizar aquera coneishença a l’avenidor.

Grops navèths…

L’annada 2020 que vedó tanben arribar a Menestrèrs Gascons tres grops navèths, que s’ajustèn a Papar’Òc e Brigada Menestrèrs, formacions istoricas de l’associacion.

• Atau qu’ei, qu’ei un grop compausat de tres joenas acordeonistas gessidas deus nostes talhèrs. Qu’avèvam dejà tocat amassa en public, mes que hasón augan la lor purmèra data oficiau.
• Lo duo Licotissa qu’entrè a la fin de 2019 dens l’associacion e que hasó los sons purmèrs concèrts com grop Menestrèrs Gascons en 2020.
• Gahem la lua que perpausa un bal a las influéncias multiplas, las soas musicianas estant originàrias de Gasconha, d’Italia e d’America deu Nòrd. Aqueth qüatuor que rejonhó l’associacion a la fin de 2020.

…e projèctes tà 2021

Aqueras escadudas que’ns dan lo coratge de començar l’annada 2021, dab los desfís que portarà. Abans tot, que perseguiram totas las activitats tà las quaus e serà possible, quau que sia lo contèxte.

La nosta prioritat en 2021 qu’ei la formacion. Purmèr a truvèrs los nostes talhèrs, dont la màger part e’s persegueishen en video. Mes que hicaram tanben l’accent sus la formacion de formators. La situacion actuau ne’ns deu pas har desbrombar que i a ua demanda creishenta tà la transmission de la dança e la musica tradicionaus, e que cau personas en capacitat de i respóner.

Mei d’ua publicacion qu’ei tanben prevista augan : la navèra edicion de Tà dançar la Gasconha, un recuèlh de particion deus Sauts bearnés e lo purmèr CD de Licotissa. Qu’esperam tanben hicar en linha un portau qui recensa tots los cors de dança, de musica e de cant tradicionaus deus Pirenèus Atltantics, atau com un aute site qui harà descobrir las cordèras professionaus ligadas ad aqueth sector.

Qu’averetz regularament navèras deus nostes grops de musica e deu noste espectacle « Hip-h’òc, une rencontre », en esperant que’us poderatz hèra lèu véder sus scèna. Los nostes eveniments costumèrs, Balmesclat e Sautejada, que’s haràn dab ua fòrma o dab ua auta. E, la nosta botiga fisica sortesca pauc per ara, que podetz retrobar çò qui perpausa sus la nosta botiga en linha, renovida en 2020.

Que preparam tanben autes projèctes qui descobriretz tot lo long de l’annada. Menestrèrs Gascons que’vs resèrva quauquas suspresas. Ne mancaram pas de’vs tiéner informats.

Que 2021 e sia plea de dança, de musica e de canta !